Starfsemin |
Starfsemi HL-stöðvarinnar |
HL-stöðin er starfrækt yfir vetrarmánuðina frá fyrri hluta september til seinni hluta maí ár hvert. Þjálfun fer fram síðdegis virka daga, mánudaga til fimmtudaga á Bjargi, Bugðusíðu 1, 603 Akureyri. Sjúkraþjálfarar sjá um þjálfunina og alltaf er læknir á staðnum meðan þjálfað er. HL-stöðin býður upp á framhaldsþjálfun fyrir fólk með hjarta- og/eða lungnasjúkdóma og fer þjálfunin fram í hópum. Nú eru starfandi fimm hópar og æfir hver hópur 2 sinnum í viku. Hver tími tekur 50-60 mínútur og er uppbygging tímanna á þann veg að fyrst er hitað upp, síðan er 25-30 mínútna æfingaáætlun þar sem notuð eru þolhjól, gönguæfingar, tæki, lóð, dýnur og fleira og að lokum er teygt á vöðvunum. Tekin eru þolpróf af öllum sem þjálfa á stöðinni og er það mikilvægur liður í að fylgjast með ástandi hjarta og lungna, svo og líkamlegri getu einstaklingsins. HL-stöðin býður einnig upp á endurhæfingu fyrir fólk sem nýbúið er að fara í kransæðavíkkun, kransæðaaðgerð eða lokuaðgerð. Slík þjálfun kallast II. stigs þjálfun og fer fram undir miklu eftirliti og í litlum hópum. Þjálfun getur hafist 7-10 dögum eftir útskrift af sjúkrahúsi ef allt er með eðlilegum hætti. Fyrst er æft 2 sinnum í viku undir miklu eftirliti og er nákvæmlega fylgst með púls- og blóðþrýstingsviðbrögðum og hjartalínuriti. Eftir 4-7 vikur frá meðferð er gert þolpróf til að meta ástand hjarta- og æðakerfisins og þol viðkomandi. Hefst þá hin eiginlega hjartaendurhæfing sem er 2 sinnum í viku og varir í aðrar 4-7 vikur. Þessi tími er mjög mikilvægur og er markmiðið að byggja upp þol og styrk sem mest. Að þessum tíma liðnum er þolpróf endurtekið, ástand og framfarir metnar og fólk útskrifað. Öllum stendur þó til boða að þjálfa áfram í framhaldshópum eftir að grunnendurhæfingu lýkur. Í lok haust- og vorannar stendur starfsfólk HL-stöðvarinnar fyrir fræðslufyrirlestrum um ýmis mál sem tengjast því að lifa með hjarta- og/eða lungnasjúkdóma. Einnig eru reglulegir fræðslufyrirlestrar á sjúkrahúsinu sem eru opnir fyrir alla hjartasjúklinga og aðstandendur þeirra (sjá dagskrá á Aðalsíðu)
|
Fyrir hverja er HL-stöðin |
HL-stöðin er fyrir fólk með hjarta- og/eða lungnasjúkdóma sem hafa verið meðhöndlaðir og eru í stöðugu ástandi. Þjálfunin er endurhæfing. HL-stöðin getur einnig hentað fólki með annars konar veikindi sem þarf á þjálfun að halda en það verður að skoða í hverju tilviki fyrir sig. |
Hvernig get ég orðið þátttakandi á HL-stöðinni? |
Æskilegt er að læknir vísi fólki á þjálfun í HL-stöðinni. Læknirinn sendir sjúkraþjálfunarbeiðni á HL-stöðina og við höfum samband eins fljótt og auðið er. |
Hvers vegna þjálfun? |
Reglubundin þjálfun hefur margþætt áhrif á líkama og sál. Það er ekki eingöngu það að við styrkjumst og úthaldið eykst. Af löngum lista hagstæðra þjálfunaráhrifa má nefna að reglubundin þjálfun lækkar blóðþrýsting, hefur jákvæð áhrif á blóðfitu einkum HDL (góða kólesterólið), minnkar líkur á fullorðinssykursýki og auðveldar okkur að halda þyngdinni í skefjum. Hún styrkir hjartavöðvann og minnkar orkuþörf hans við álag. Þannig komumst við léttar í gegnum athafnir daglegs lífs, vellíðan eykst og við njótum lífsins betur. |
Gjald fyrir þátttöku |
Frá og með 1. maí 2017 breyttist gjaldtaka í HL-stöð: Þátttakendur á stigi I og II greiða gjald sem samsvarar greiðslum sjúkratryggðra fyrir hópameðferð I í sjúkraþjálfun. Þátttakendur á stigi III greiða gjald sem samsvarar greiðslum sjúkratryggðra fyrir hópameðferð II í sjúkraþjálfun. Hægt er að finna gjaldskrá fyrir sjúkraþjálfun inn á sjukra.is. Þeir sem falla ekki undir skilyrði sem SÍ setur fyrir þátttöku í HL-stöð gegnum sjúkratryggingarkerfið greiða 1000 kr fyrir tímann og ef til kemur eru tveir fyrstu fjarverutímar í hverjum mánuði greiðsluskyldir. Gjald fyrir þolpróf: Allir þátttakendur greiða gjald fyrir þolpróf samkvæmt gjaldskrá sjúklinga til klíniskra sérfræðilækna. Greiðsluseðlar eru sendir út í lok hvers mánaðar. Mörg stéttarfélög taka þátt í kostnaði félagsmanna sinna vegna þjálfunar á HL-stöðinni. Að gefnu tilefni er hér eftirfarandi skýring á því hvers vegna stundum kemur hár reikningur og stundum er hann ekki nema rétt um 3000 krónur: Allir þurfa að borga hámarksgreiðslu á hverju ári og þegar henni hefur verið náð, dettur reikningurinn niður aftur en svo ári seinna þarf að komast aftur upp í þessa hámarksgreiðslu áður en reikningurinn lækkar aftur. Margir eru lítið búnir að vera gera undanfarið svo sennilega finna þeir fyrir því núna að öll hámarksgreiðslan fer beint inn á HL reikninginn en hefur kannski áður eitthvað skipst milli staða áður eins og t.d ef einhver hefur verið hjá lækni, farið í myndatöku o. s. frv. Reikningar eru mismunandi og ekki hægt að bera þá saman milli einstaklinga þar sem þetta er tengt þessari hámarksupphæð og hvar einstaklingur er staddur í kerfinu og einnig ef einstaklingar fara ekki í gegnum SÍ þá er allt annað kerfi sem þeir tilheyra. Hámarksgreiðslan frá 1. janúar 2021 er kr. 27.475. Hún er þó lægri hjá öldruðum, öryrkjum og börnum eða kr. 18.317. Börn með sama fjölskyldunúmer samkvæmt skilgreiningu Þjóðskrár Íslands teljast sem einn einstaklingur í greiðsluþátttökukerfinu. Sú nýbreytni er í nýju greiðsluþátttökukerfi að greiðslur sjúkratryggðra einstaklinga fyrir þjónustu vegna þjálfunar, læknishjálpar o.fl. telja saman upp í hámarksgjald. Greiðslur fyrir þjónustu sem veitt er á heilsugæslustöðvum og sjúkrahúsum falla undir kerfið, ásamt heilbrigðisþjónustu hjá sjálfstætt starfandi læknum, sjúkraþjálfurum, iðjuþjálfum, talmeinafræðingum og sálfræðingum. Greiðsluþátttaka hjá sálfræðingum sem eru á rammsamning á eingöngu við um börn yngri en 18 ára og hafa tílvísun frá tilvísunarteymi sem SÍ hefur samið við. Hægt er að fá fleiri upplýsingar hjá ritara HL- stöðvarinnar á Bjargi. |
Yfirlit yfir fræðslufyrirlestra síðastliðinna ára |
|